Om oversættelsen: Septuaginta er den græske tradition — den som Helligånden foretrækker.
Teksten er i græske bogstaver med Unicode. Hvis man foretrækker danske bogstaver, anbefales parallelsiden: Tredje Makkabæerbog.
Om bogen: Septuaginta indholder en række bøger og tekster, som ikke er med i den jødiske masoretiske teksttradition. Disse bøger accepteres af katolikker, mens protestanter regner dem for apokryfe.
1 ο δε Φιλοπατωρ παρα των ανακομισθεντων μαθων την γενομενην των υπ αυτου κρατουμενων τοπων αφαιρεσιν υπο Αντιοχου παραγγειλας ταις πασαις δυναμεσιν πεζικαις τε και ιππικαις και την αδελφην Αρσινοην συμπαραλαβων εξωρμησεν μεχρι των κατα Ραφιαν τοπων οπου παρεμβεβληκεισαν οι περι Αντιοχον
2 Θεοδοτος δε τις εκπληρωσαι την επιβουλην διανοηθεις παραλαβων των προυποτεταγμενων αυτω οπλων Πτολεμαικων τα κρατιστα διεκομισθη νυκτωρ επι την του Πτολεμαιου σκηνην ως μονος κτειναι αυτον και εν τουτω διαλυσαι τον πολεμον
3 τουτον δε διαγαγων Δοσιθεος ο Δριμυλου λεγομενος το γενος Ιουδαιος υστερον δε μεταβαλων τα νομιμα και των πατριων δογματων απηλλοτριωμενος ασημον τινα κατεκλινεν εν τη σκηνη ον συνεβη κομισασθαι την εκεινου κολασιν
4 γενομενης δε καρτερας μαχης και των πραγματων μαλλον ερρωμενων τω Αντιοχω ικανως η Αρσινοη επιπορευσαμενη τας δυναμεις παρεκαλει μετα οικτου και δακρυων τους πλοκαμους λελυμενη βοηθειν εαυτοις τε και τοις τεκνοις και γυναιξιν θαρραλεως επαγγελλομενη δωσειν νικησασιν εκαστω δυο μνας χρυσιου
5 και ουτως συνεβη τους αντιπαλους εν χειρονομιαις διαφθαρηναι πολλους δε και δοριαλωτους συλλημφθηναι
6 κατακρατησας δε της επιβουλης εκρινεν τας πλησιον πολεις επελθων παρακαλεσαι
7 ποιησας δε τουτο και τοις τεμενεσι δωρεας απονειμας ευθαρσεις τους υποτεταγμενους κατεστησεν
8 των δε Ιουδαιων διαπεμψαμενων προς αυτον απο της γερουσιας και των πρεσβυτερων τους ασπασομενους αυτον και ξενια κομιουντας και επι τοις συμβεβηκοσιν χαρισομενους συνεβη μαλλον αυτον προθυμηθηναι ως ταχιστα προς αυτους παραγενεσθαι
9 διακομισθεις δε εις Ιεροσολυμα και θυσας τω μεγιστω θεω και χαριτας αποδους και των εξης τι τω τοπω ποιησας και δη παραγενομενος εις τον τοπον και τη σπουδαιοτητι και ευπρεπεια καταπλαγεις
10 θαυμασας δε και την του ιερου ευταξιαν ενεθυμηθη βουλευσασθαι εις τον ναον εισελθειν
11 των δε ειποντων μη καθηκειν γινεσθαι τουτο δια το μηδε τοις εκ του εθνους εξειναι εισιεναι μηδε πασιν τοις ιερευσιν αλλ η μονω τω προηγουμενω παντων αρχιερει και τουτω κατ ενιαυτον απαξ ο δε ουδαμως επειθετο
12 του τε νομου παραναγνωσθεντος ουδ ως απελιπεν προφερομενος εαυτον δειν εισελθειν λεγων και ει εκεινοι εστερηνται ταυτης της τιμης εμε δε ου δει
13 και επυνθανετο δια τινα αιτιαν εισερχομενον αυτον εις παν τεμενος ουθεις εκωλυσεν των παροντων
14 και τις απρονοητως εφη κακως αυτο τουτο τερατευεσθαι
15 γενομενου δε φησιν τουτου δια τινα αιτιαν ουχι παντως εισελευσεσθαι και θελοντων αυτων και μη
16 των δε ιερεων εν πασαις ταις εσθησεσιν προσπεσοντων και δεομενων του μεγιστου θεου βοηθειν τοις ενεστωσιν και την ορμην του κακως επιβαλλομενου μεταθειναι κραυγης τε μετα δακρυων το ιερον εμπλησαντων
17 οι κατα την πολιν απολειπομενοι ταραχθεντες εξεπηδησαν αδηλον τιθεμενοι το γινομενον
18 αι τε κατακλειστοι παρθενοι εν θαλαμοις συν ταις τεκουσαις εξωρμησαν και απεδωκαν κονει τας κομας πασαμεναι γοου τε και στεναγμων ενεπιμπλων τας πλατειας
19 αι δε και προσαρτιως εσταλμεναι τους προς απαντησιν διατεταγμενους παστους και την αρμοζουσαν αιδω παραλειπουσαι δρομον ατακτον εν τη πολει συνισταντο
20 τα δε νεογνα των τεκνων αι προς τουτοις μητερες και τιθηνοι παραλειπουσαι αλλως και αλλως αι μεν κατ οικους αι δε κατα τας αγυιας ανεπιστρεπτως εις το πανυπερτατον ιερον ηθροιζοντο
21 ποικιλη δε ην των εις τουτο συλλεγεντων η δεησις επι τοις ανοσιως υπ εκεινου κατεγχειρουμενοις
22 συν τε τουτοις οι περι των πολιτων θρασυνθεντες ουκ ηνειχοντο τελεον αυτου επικειμενου και το της προθεσεως εκπληρουν διανοουμενου
23 φωνησαντες δε την ορμην επι τα οπλα ποιησασθαι και θαρραλεως υπερ του πατρωου νομου τελευταν ικανην εποιησαν εν τω τοπω τραχυτητα μολις δε υπο τε των γεραιων και των πρεσβυτερων αποτραπεντες επι την αυτην της δεησεως παρησαν στασιν
24 και το μεν πληθος ως εμπροσθεν εν τουτοις ανεστρεφετο δεομενον
25 οι δε περι τον βασιλεα πρεσβυτεροι πολλαχως επειρωντο τον αγερωχον αυτου νουν εξιστανειν της εντεθυμημενης επιβουλης
26 θρασυνθεις δε και παντα παραπεμψας ηδη και προσβασιν εποιειτο τελος επιθησειν δοκων τω προειρημενω
27 ταυτα ουν και οι περι αυτον οντες θεωρουντες ετραπησαν εις το συν τοις ημετεροις επικαλεισθαι τον παν κρατος εχοντα τοις παρουσιν επαμυναι μη παριδοντα την ανομον και υπερηφανον πραξιν
28 εκ δε της πυκνοτατης τε και εμπονου των οχλων συναγομενης κραυγης ανεικαστος τις ην βοη
29 δοκειν γαρ ην μη μονον τους ανθρωπους αλλα και τα τειχη και το παν εδαφος ηχειν ατε δη των παντων τοτε θανατον αλλασσομενων αντι της του τοπου βεβηλωσεως
1 ο μεν ουν αρχιερευς Σιμων εξ εναντιας του ναου καμψας τα γονατα και τας χειρας προτεινας ευτακτως εποιησατο την δεησιν τοιαυτην
2 κυριε κυριε βασιλευ των ουρανων και δεσποτα πασης κτισεως αγιε εν αγιοις μοναρχε παντοκρατωρ προσχες ημιν καταπονουμενοις υπο ανοσιου και βεβηλου θρασει και σθενει πεφρυαγμενου
3 συ γαρ ο κτισας τα παντα και των ολων επικρατων δυναστης δικαιος ει και τους υβρει και αγερωχια τι πρασσοντας κρινεις
4 συ τους εμπροσθεν αδικιαν ποιησαντας εν οις και γιγαντες ησαν ρωμη και θρασει πεποιθοτες διεφθειρας επαγαγων αυτοις αμετρητον υδωρ
5 συ τους υπερηφανιαν εργαζομενους Σοδομιτας διαδηλους ταις κακιαις γενομενους πυρι και θειω κατεφλεξας παραδειγμα τοις επιγινομενοις καταστησας
6 συ τον θρασυν Φαραω καταδουλωσαμενον τον λαον σου τον αγιον Ισραηλ ποικιλαις και πολλαις δοκιμασας τιμωριαις εγνωρισας την σην δυναμιν εφ οις εγνωρισας το μεγα σου κρατος
7 και επιδιωξαντα αυτον συν αρμασιν και οχλων πληθει επεκλυσας βαθει θαλασσης τους δε εμπιστευσαντας επι σοι τω της απασης κτισεως δυναστευοντι σωους διεκομισας
8 οι και συνιδοντες εργα σης χειρος ηνεσαν σε τον παντοκρατορα
9 συ βασιλευ κτισας την απεραντον και αμετρητον γην εξελεξω την πολιν ταυτην και ηγιασας τον τοπον τουτον εις ονομα σοι τω των απαντων απροσδεει και παρεδοξασας εν επιφανεια μεγαλοπρεπει συστασιν ποιησαμενος αυτου προς δοξαν του μεγαλου και εντιμου ονοματος σου
10 και αγαπων τον οικον του Ισραηλ επηγγειλω διοτι εαν γενηται ημων αποστροφη και καταλαβη ημας στενοχωρια και ελθοντες εις τον τοπον τουτον δεηθωμεν εισακουση της δεησεως ημων
11 και δη πιστος ει και αληθινος
12 επει δε πλεονακις θλιβεντων των πατερων ημων εβοηθησας αυτοις εν τη ταπεινωσει και ερρυσω αυτους εκ μεγαλων κακων
13 ιδου δε νυν αγιε βασιλευ δια τας πολλας και μεγαλας ημων αμαρτιας καταπονουμεθα και υπεταγημεν τοις εχθροις ημων και παρειμεθα εν αδυναμιαις
14 εν δε τη ημετερα καταπτωσει ο θρασυς και βεβηλος ουτος επιτηδευει καθυβρισαι τον επι της γης αναδεδειγμενον τω ονοματι της δοξης σου αγιον τοπον
15 το μεν γαρ κατοικητηριον σου ουρανος του ουρανου ανεφικτος ανθρωποις εστιν
16 αλλα επει ευδοκησας την δοξαν σου εν τω λαω σου Ισραηλ ηγιασας τον τοπον τουτον
17 μη εκδικησης ημας εν τη τουτων ακαθαρσια μηδε ευθυνης ημας εν βεβηλωσει ινα μη καυχησωνται οι παρανομοι εν θυμω αυτων μηδε αγαλλιασωνται εν υπερηφανια γλωσσης αυτων λεγοντες
18 ημεις κατεπατησαμεν τον οικον του αγιασμου ως καταπατουνται οι οικοι των προσοχθισματων
19 απαλειψον τας αμαρτιας ημων και διασκεδασον τας αμβλακιας ημων και επιφανον το ελεος σου κατα την ωραν ταυτην
20 ταχυ προκαταλαβετωσαν ημας οι οικτιρμοι σου και δος αινεσεις εν τω στοματι των καταπεπτωκοτων και συντετριμμενων τας ψυχας ποιησας ημιν ειρηνην
21 ενταυθα ο παντων εποπτης θεος και προπατωρ αγιος εν αγιοις εισακουσας της ενθεσμου λιτανειας τον υβρει και θρασει μεγαλως επηρμενον εμαστιξεν αυτον
22 ενθεν και ενθεν κραδανας αυτον ως καλαμον υπο ανεμου ωστε κατ εδαφους απρακτον ετι και τοις μελεσιν παραλελυμενον μηδε φωνησαι δυνασθαι δικαια περιπεπληγμενον κρισει
23 οθεν οι τε φιλοι και σωματοφυλακες οξειαν ιδοντες την καταλαβουσαν αυτον ευθυναν φοβουμενοι μη και το ζην εκλειπη ταχεως αυτον εξειλκυσαν υπερβαλλοντι καταπεπληγμενοι φοβω
24 εν χρονω δε υστερον αναλεξαμενος αυτον ουδαμως εις μεταμελον ηλθεν επιτιμηθεις απειλας δε πικρας θεμενος ανελυσεν
25 διακομισθεις δε εις την Αιγυπτον και τα της κακιας επαυξων δια τε των προαποδεδειγμενων συμποτων και εταιρων του παντος δικαιου κεχωρισμενων
26 ου μονον ταις αναριθμητοις ασελγειαις διηρκεσθη αλλα και επι τοσουτον θρασους προηλθεν ωστε δυσφημιας εν τοις τοποις συνιστασθαι και πολλους των φιλων ατενιζοντας εις την του βασιλεως προθεσιν και αυτους επεσθαι τη εκεινου θελησει
27 προεθετο δημοσια κατα του εθνους διαδουναι ψογον επι του κατα την αυλην πυργου στηλην αναστησας εκολαψεν γραφην
28 μηδενα των μη θυοντων εις τα ιερα αυτων εισιεναι παντας δε τους Ιουδαιους εις λαογραφιαν και οικετικην διαθεσιν αχθηναι τους δε αντιλεγοντας βια φερομενους του ζην μεταστησαι
29 τους τε απογραφομενους χαρασσεσθαι και δια πυρος εις το σωμα παρασημω Διονυσου κισσοφυλλω ους και καταχωρισαι εις την προσυνεσταλμενην αυθεντιαν
30 ινα δε μη τοις πασιν απεχθομενος φαινηται υπεγραψεν εαν δε τινες εξ αυτων προαιρωνται εν τοις κατα τας τελετας μεμυημενοις αναστρεφεσθαι τουτους ισοπολιτας Αλεξανδρευσιν ειναι
31 ενιοι μεν ουν επιπολαιως τας της πολεως ευσεβειας επιβαθρας στυγουντες ευχερως εαυτους εδιδοσαν ως μεγαλης τινος κοινωνησοντες ευκλειας απο της εσομενης τω βασιλει συναναστροφης
32 οι δε πλειστοι γενναια ψυχη ενισχυσαν και ου διεστησαν της ευσεβειας τα τε χρηματα περι του ζην αντικαταλλασσομενοι αδεως επειρωντο εαυτους ρυσασθαι εκ των απογραφων
33 ευελπιδες τε καθειστηκεισαν αντιλημψεως τευξασθαι και τους αποχωρουντας εξ αυτων εβδελυσσοντο και ως πολεμιους του εθνους εκρινον και της κοινης συναναστροφης και ευχρηστιας εστερουν
1 α και μεταλαμβανων ο δυσσεβης επι τοσουτον εξεχολησεν ωστε ου μονον τοις κατα Αλεξανδρειαν διοργιζεσθαι αλλα και τοις εν τη χωρα βαρυτερως εναντιωθηναι και προσταξαι σπευσαντας συναγαγειν παντας επι το αυτο και χειριστω μορω του ζην μεταστησαι
2 τουτων δε οικονομουμενων φημη δυσμενης εξηχειτο κατα του γενους ανθρωποις συμφρονουσιν εις κακοποιησιν αφορμης διδομενης εις διαθεσιν ως αν απο των νομιμων αυτους κωλυοντων
3 οι δε Ιουδαιοι την μεν προς τους βασιλεις ευνοιαν και πιστιν αδιαστροφον ησαν φυλασσοντες
4 σεβομενοι δε τον θεον και τω τουτου νομω πολιτευομενοι χωρισμον εποιουν επι τω κατα τας τροφας δι ην αιτιαν ενιοις απεχθεις εφαινοντο
5 τη δε των δικαιων ευπραξια κοσμουντες την συναναστροφην απασιν ανθρωποις ευδοκιμοι καθειστηκεισαν
6 την μεν ουν περι του γενους εν πασιν θρυλουμενην ευπραξιαν οι αλλοφυλοι ουδαμως διηριθμησαντο
7 την δε περι των προσκυνησεων και τροφων διαστασιν εθρυλουν φασκοντες μητε τω βασιλει μητε ταις δυναμεσιν ομοσπονδους τους ανθρωπους γινεσθαι δυσμενεις δε ειναι και μεγα τι τοις πραγμασιν εναντιουμενους και ου τω τυχοντι περιηψαν ψογω
8 οι δε κατα την πολιν {Ελληνες ουδεν ηδικημενοι ταραχην απροσδοκητον περι τους ανθρωπους θεωρουντες και συνδρομας απροσκοπους γινομενας βοηθειν μεν ουκ εσθενον τυραννικη γαρ ην η διαθεσις παρεκαλουν δε και δυσφορως ειχον και μεταπεσεισθαι ταυτα υπελαμβανον
9 μη γαρ ουτω παροραθησεσθαι τηλικουτο συστεμα μηδεν ηγνοηκος
10 ηδη δε και τινες γειτονες τε και φιλοι και συμπραγματευομενοι μυστικως τινας επισπωμενοι πιστεις εδιδουν συνασπιειν και παν εκτενες προσοισεσθαι προς αντιλημψιν
11 εκεινος μεν ουν τη κατα το παρον ευημερια γεγαυρωμενος και ου καθορων το του μεγιστου θεου κρατος υπολαμβανων δε διηνεκως εν τη αυτη διαμενειν βουλη εγραψεν κατ αυτων επιστολην τηνδε
12 βασιλευς Πτολεμαιος Φιλοπατωρ τοις κατ Αιγυπτον και κατα τοπον στρατηγοις και στρατιωταις χαιρειν και ερρωσθαι
13 ερρωμαι δε και αυτος εγω και τα πραγματα ημων
14 της εις την Ασιαν γενομενης ημιν επιστρατειας ης ιστε και αυτοι τη των θεων απροπτωτω συμμαχια κατα λογον επι τελος αχθεισης
15 ηγησαμεθα μη βια δορατος επιεικεια δε και πολλη φιλανθρωπια τιθηνησασθαι τα κατοικουντα Κοιλην Συριαν και Φοινικην εθνη ευ ποιησαι τε ασμενως
16 και τοις κατα πολιν ιεροις απονειμαντες προσοδους πλειστας προηχθημεν και εις τα Ιεροσολυμα αναβαντες τιμησαι το ιερον των αλιτηριων και μηδεποτε ληγοντων της ανοιας
17 οι δε λογω μεν την ημετεραν αποδεξαμενοι παρουσιαν τω δε πραγματι νοθως προθυμηθεντων ημων εισελθειν εις τον ναον αυτων και τοις εκπρεπεσιν και καλλιστοις αναθημασιν τιμησαι
18 τυφοις φερομενοι παλαιοτεροις ειρξαν ημας της εισοδου λειπομενοι της ημετερας αλκης δι ην εχομεν προς απαντας ανθρωπους φιλανθρωπιαν
19 την δε αυτων εις ημας δυσμενειαν εκδηλον καθισταντες ως μονωτατοι των εθνων βασιλευσιν και τοις εαυτων ευεργεταις υψαυχενουντες ουδεν γνησιον βουλονται φερειν
20 ημεις δε τη τουτων ανοια συμπεριενεχθεντες και μετα νικης διακομισθεντες εις την Αιγυπτον τοις πασιν εθνεσιν φιλανθρωπως απαντησαντες καθως επρεπεν εποιησαμεν
21 εν δε τουτοις προς τους ομοφυλους αυτων αμνησικακιαν απασιν γνωριζοντες δια τε την συμμαχιαν και τα πεπιστευμενα μετα απλοτητος αυτοις αρχηθεν μυρια πραγματα τολμησαντες εξαλλοιωσαι εβουληθημεν και πολιτειας αυτους Αλεξανδρεων καταξιωσαι και μετοχους των αει ιερων καταστησαι
22 οι δε τουναντιον εκδεχομενοι και τη συμφυτω κακοηθεια το καλον απωσαμενοι διηνεκως δε εις το φαυλον εκνευοντες
23 ου μονον απεστρεψαντο την ατιμητον πολιτειαν αλλα και βδελυσσονται λογω τε και σιγη τους εν αυτοις ολιγους προς ημας γνησιως διακειμενους παρ εκαστα υφορωμενοι μετα της δυσκλεεστατης εμβιωσεως δια ταχους ημας καταστρεψαι τα πραγματα
24 διο και τεκμηριοις καλως πεπεισμενοι τουτους κατα παντα δυσνοειν ημιν τροπον και προνοουμενοι μηποτε αιφνιδιου μετεπειτα ταραχης ενστασης ημιν τους δυσσεβεις τουτους κατα νωτου προδοτας και βαρβαρους εχωμεν πολεμιους
25 προστεταχαμεν αμα τω προσπεσειν την επιστολην τηνδε αυθωρι τους εννεμομενους συν γυναιξι και τεκνοις μετα υβρεων και σκυλμων αποστειλαι προς ημας εν δεσμοις σιδηροις παντοθεν κατακεκλεισμενους εις ανηκεστον και δυσκλεη πρεποντα δυσμενεσι φονον
26 τουτων γαρ ομου κολασθεντων διειληφαμεν εις τον επιλοιπον χρονον τελειως ημιν τα πραγματα εν ευσταθεια και τη βελτιστη διαθεσει κατασταθησεσθαι
27 ος δ αν σκεπαση τινα των Ιουδαιων απο γεραιου μεχρι νηπιου και μεχρι των υπομαστιδιων αισχισταις βασανοις αποτυμπανισθησεται πανοικια
28 μηνυειν δε τον βουλομενον εφ ω την ουσιαν του εμπιπτοντος υπο την ευθυναν λημψεται και εκ του βασιλικου αργυριου δραχμας δισχιλιας και τη ελευθερια στεφανωθησεται
29 πας δε τοπος ου εαν φωραθη το συνολον σκεπαζομενος Ιουδαιος αβατος και πυριφλεγης γινεσθω και παση θνητη φυσει καθ απαν αχρηστος φανησεται εις τον αει χρονον
30 και ο μεν της επιστολης τυπος ουτως εγεγραπτο
1 παντη δε οπου προσεπιπτεν τουτο το προσταγμα δημοτελης συνιστατο τοις εθνεσιν ευωχια μετα αλαλαγμων και χαρας ως αν της προκατεσκιρωμενης αυτοις παλαι κατα διανοιαν μετα παρρησιας νυν εκφαινομενης απεχθειας
2 τοις δε Ιουδαιοις αληκτον πενθος ην και πανοδυρτος μετα δακρυων βοη στεναγμοις πεπυρωμενης παντοθεν αυτων της καρδιας ολοφυρομενων την απροσδοκητον εξαιφνης αυτοις επικριθεισαν ολεθριαν
3 τις νομος η πολις η τις το συνολον οικητος τοπος η τινες αγυιαι κοπετου και γοων επ αυτοις ουκ ενεπιπλωντο
4 ουτως γαρ μετα πικριας ανοικτου ψυχης υπο των κατα πολιν στρατηγων ομοθυμαδον εξαπεστελλοντο ωστε επι ταις εξαλλοις τιμωριαις και τινας των εχθρων λαμβανοντας προ των οφθαλμων τον κοινον ελεον και λογιζομενους την αδηλον του βιου καταστροφην δακρυειν αυτων την δυσαθλιον εξαποστολην
5 ηγετο γαρ γεραιων πληθος πολια πεπυκασμενων την εκ του γηρως νωθροτητα ποδων επικυφον ανατροπης ορμη βιαιας απασης αιδους ανευ προς οξειαν καταχρωμενων πορειαν
6 αι δε αρτι προς βιου κοινωνιαν γαμικον υπεληλυθυιαι παστον νεανιδες αντι τερψεως μεταλαβουσαι γοους και κονει την μυροβρεχη πεφυρμεναι κομην ακαλυπτως δε αγομεναι θρηνον ανθ υμεναιων ομοθυμαδον εξηρχον ως εσπαραγμεναι σκυλμοις αλλοεθνεσιν
7 δεσμιαι δε δημοσια μεχρι της εις το πλοιον εμβολης ειλκοντο μετα βιας
8 οι τε τουτων συνζυγεις βροχοις αντι στεφεων τους αυχενας περιπεπλεγμενοι μετα ακμαιας νεανικης ηλικιας αντι ευωχιας και νεωτερικης ραθυμιας τας επιλοιπους των γαμων ημερας εν θρηνοις διηγον παρα ποδας ηδη τον αδην ορωντες κειμενον
9 κατηχθησαν δε θηριων τροπον αγομενοι σιδηροδεσμοις αναγκαις οι μεν τοις ζυγοις των πλοιων προσηλωμενοι τους τραχηλους οι δε τους ποδας αρρηκτοις κατησφαλισμενοι πεδαις
10 ετι και τω καθυπερθε πυκνω σανιδωματι διακειμενω οπως παντοθεν εσκοτισμενοι τους οφθαλμους αγωγην επιβουλων εν παντι τω καταπλω λαμβανωσιν
11 τουτων δε επι την λεγομενην Σχεδιαν αχθεντων και του παραπλου περανθεντος καθως ην δεδογματισμενον τω βασιλει προσεταξεν αυτους εν τω προ της πολεως ιπποδρομω παρεμβαλειν απλατω καθεστωτι περιμετρω και προς παραδειγματισμον αγαν ευκαιροτατω καθεστωτι πασι τοις καταπορευομενοις εις την πολιν και τοις εκ τουτων εις την χωραν στελλομενοις προς εκδημιαν προς το μηδε ταις δυναμεσιν αυτου κοινωνειν μηδε το συνολον καταξιωσαι περιβολων
12 ως δε τουτο εγενηθη ακουσας τους εκ της πολεως ομοεθνεις κρυβη εκπορευομενους πυκνοτερον αποδυρεσθαι την ακλεη των αδελφων ταλαιπωριαν
13 διοργισθεις προσεταξεν και τουτοις ομου τον αυτον τροπον επιμελως ως εκεινοις ποιησαι μη λειπομενοις κατα μηδενα τροπον της εκεινων τιμωριας
14 απογραφηναι δε παν το φυλον εξ ονοματος ουκ εις την εμπροσθεν βραχει προδεδηλωμενην των εργων καταπονον λατρειαν στρεβλωθεντας δε ταις παρηγγελμεναις αικιαις το τελος αφανισαι μιας υπο καιρον ημερας
15 εγινετο μεν ουν η τουτων απογραφη μετα πικρας σπουδης και φιλοτιμου προσεδρειας απο ανατολων ηλιου μεχρι δυσμων ανηνυτον λαμβανουσα το τελος επι ημερας τεσσαρακοντα
16 μεγαλως δε και διηνεκως ο βασιλευς χαρα πεπληρωμενος συμποσια επι παντων των ειδωλων συνισταμενος πεπλανημενη πορρω της αληθειας φρενι και βεβηλω στοματι τα μεν κωφα και μη δυναμενα αυτοις λαλειν η αρηγειν επαινων εις δε τον μεγιστον θεον τα μη καθηκοντα λαλων
17 μετα δε το προειρημενον του χρονου διαστημα προσηνεγκαντο οι γραμματεις τω βασιλει μηκετι ισχυειν την των Ιουδαιων απογραφην ποιεισθαι δια την αμετρητον αυτων πληθυν
18 καιπερ οντων ετι κατα την χωραν των πλειονων των μεν κατα τας οικιας ετι συνεστηκοτων των δε και κατα τοπον ως αδυνατου καθεστωτος πασιν τοις επ Αιγυπτον στρατηγοις
19 απειλησαντος δε αυτοις σκληροτερον ως δεδωροκοπημενοις εις μηχανην της εκφυγης συνεβη σαφως αυτον περι τουτου πιστωθηναι
20 λεγοντων μετα αποδειξεως και την χαρτηριαν ηδη και τους γραφικους καλαμους εν οις εχρωντο εκλελοιπεναι
21 τουτο δε ην ενεργεια της του βοηθουντος τοις Ιουδαιοις εξ ουρανου προνοιας ανικητου
1 τοτε προσκαλεσαμενος {Ερμωνα τον προς τη των ελεφαντων επιμελεια βαρεια μεμεστωμενος οργη και χολω κατα παν αμεταθετος
2 εκελευσεν υπο την επερχομενην ημεραν δαψιλεσι δρακεσι λιβανωτου και οινω πλειονι ακρατω απαντας τους ελεφαντας ποτισαι οντας τον αριθμον πεντακοσιους και αγριωθεντας τη του ποματος αφθονω χορηγια εισαγαγειν προς συναντησιν του μορου των Ιουδαιων
3 ο μεν ταδε προστασσων ετρεπετο προς την ευωχιαν συναγαγων τους μαλιστα των φιλων και της στρατιας απεχθως εχοντας προς τους Ιουδαιους
4 ο δε ελεφανταρχης το προσταγεν αραροτως {Ερμων συνετελει
5 οι τε προς τουτοις λειτουργοι κατα την εσπεραν εξιοντες τας των ταλαιπωρουντων εδεσμευον χειρας την τε λοιπην εμηχανωντο περι αυτους ασφαλειαν εννυχον δοξαντες ομου λημψεσθαι το φυλον περας της ολεθριας
6 οι δε πασης σκεπης ερημοι δοκουντες ειναι τοις εθνεσιν Ιουδαιοι δια την παντοθεν περιεχουσαν αυτους μετα δεσμων αναγκην
7 τον παντοκρατορα κυριον και πασης δυναμεως δυναστευοντα ελεημονα θεον αυτων και πατερα δυσκαταπαυστω βοη παντες μετα δακρυων επεκαλεσαντο δεομενοι
8 την κατ αυτων μεταστρεψαι βουλην ανοσιαν και ρυσασθαι αυτους μετα μεγαλομερους επιφανειας εκ του παρα ποδας εν ετοιμω μορου
9 τουτων μεν ουν εκτενως η λιτανεια ανεβαινεν εις τον ουρανον
10 ο δε {Ερμων τους ανηλεεις ελεφαντας ποτισας πεπληρωμενους της του οινου πολλης χορηγιας και του λιβανου μεμεστωμενους ορθριος επι την αυλην παρην περι τουτων προσαγγειλαι τω βασιλει
11 το δε απ αιωνος χρονου κτισμα καλον εν νυκτι και ημερα επιβαλλομενον υπο του χαριζομενου πασιν οις αν αυτος θεληση υπνου μερος απεστειλεν εις τον βασιλεα
12 και ηδιστω και βαθει κατεσχεθη τη ενεργεια του δεσποτου της αθεσμου μεν προθεσεως πολυ διεσφαλμενος του δε αμεταθετου λογισμου μεγαλως διεψευσμενος
13 οι τε Ιουδαιοι την προσημανθεισαν ωραν διαφυγοντες τον αγιον ηνουν θεον αυτων και παλιν ηξιουν τον ευκαταλλακτον δειξαι μεγαλοσθενους εαυτου χειρος κρατος εθνεσιν υπερηφανοις
14 μεσουσης δε ηδη δεκατης ωρας σχεδον ο προς ταις κλησεσιν τεταγμενος αθροους τους κλητους ιδων ενυξεν προσελθων τον βασιλεα
15 και μολις διεγειρας υπεδειξε τον της συμποσιας καιρον ηδη παρατρεχοντα τον περι τουτων λογον ποιουμενος
16 ον ο βασιλευς λογισαμενος και τραπεις εις τον ποτον εκελευσεν τους παραγεγονοτας επι την συμποσιαν αντικρυς ανακλιναι αυτου
17 ου και γενομενου παρηνει εις ευωχιαν δοντας εαυτους το παρον της συμποσιας επι πολυ γεραιρομενους εις ευφροσυνην καταθεσθαι μερος
18 επι πλειον δε προβαινουσης της ομιλιας τον {Ερμωνα προσκαλεσαμενος ο βασιλευς μετα πικρας απειλης επυνθανετο τινος ενεκεν αιτιας ειαθησαν οι Ιουδαιοι την περιουσαν ημεραν περιβεβιωκοτες
19 του δε υποδειξαντος ετι νυκτος το προσταγεν επι τελος αγειοχεναι και των φιλων αυτω προσμαρτυρησαντων
20 την ωμοτητα χειρονα Φαλαριδος εσχηκως εφη τω της σημερον υπνω χαριν εχειν αυτους ανυπερθετως δε εις την επιτελουσαν ημεραν κατα το ομοιον ετοιμασον τους ελεφαντας επι τον των αθεμιτων Ιουδαιων αφανισμον
21 ειποντος δε του βασιλεως ασμενως παντες μετα χαρας οι παροντες ομου συναινεσαντες εις τον ιδιον οικον εκαστος ανελυσεν
22 και ουχ ουτως εις υπνον κατεχρησαντο τον χρονον της νυκτος ως εις το παντοιους μηχανασθαι τοις ταλαιπωροις δοκουσιν εμπαιγμους
23 αρτι δε αλεκτρυων εκεκραγεν ορθριος και τα θηρια καθωπλικως ο {Ερμων εν τω μεγαλω περιστυλω διεκινει
24 τα δε κατα την πολιν πληθη συνηθροιστο προς την οικτροτατην θεωριαν προσδοκωντα την πρωιαν μετα σπουδης
25 οι δε Ιουδαιοι κατα τον αμερη ψυχουλκουμενοι χρονον πολυδακρυν ικετειαν εν μελεσιν γοεροις τεινοντες τας χειρας εις τον ουρανον εδεοντο του μεγιστου θεου παλιν αυτοις βοηθησαι συντομως
26 ουπω δε ηλιου βολαι κατεσπειροντο και του βασιλεως τους φιλους εκδεχομενου ο {Ερμων παραστας εκαλει προς την εξοδον υποδεικνυων το προθυμον του βασιλεως εν ετοιμω κεισθαι
27 του δε αποδεξαμενου και καταπλαγεντος επι τη παρανομω εξοδω κατα παν αγνωσια κεκρατημενος επυνθανετο τι το πραγμα εφ ου τουτο αυτω μετα σπουδης τετελεσται
28 τουτο δε ην η ενεργεια του παντα δεσποτευοντος θεου των πριν αυτω μεμηχανημενων ληθην κατα διανοιαν εντεθεικοτος
29 υπεδεικνυεν ο {Ερμων και παντες οι φιλοι τα θηρια και τας δυναμεις ητοιμασθαι βασιλευ κατα την σην εκτενη προθεσιν
30 ο δε επι τοις ρηθεισιν πληρωθεις βαρει χολω δια το περι τουτων προνοια θεου διεσκεδασθαι παν αυτου το νοημα ενατενισας μετα απειλης ειπεν
31 οσοι γονεις παρησαν η παιδων γονοι τηνδε θηρσιν αγριοις εσκευασα αν δαψιλη θοιναν αντι των ανεγκλητων εμοι και προγονοις εμοις αποδεδειγμενων ολοσχερη βεβαιαν πιστιν εξοχως Ιουδαιων
32 καιπερ ει μη δια την της συντροφιας στοργην και της χρειας το ζην αντι τουτων εστερηθης
33 ουτως ο {Ερμων απροσδοκητον επικινδυνον υπηνεγκεν απειλην και τη ορασει και τω προσωπω συνεσταλη
34 ο καθεις δε των φιλων σκυθρωπως υπεκρεων τους συνηθροισμενους απελυσαν εκαστον επι την ιδιαν ασχολιαν
35 οι τε Ιουδαιοι τα παρα του βασιλεως ακουσαντες τον επιφανη θεον κυριον βασιλεα των βασιλεων ηνουν και τησδε της βοηθειας αυτου τετευχοτες
36 κατα δε τους αυτους νομους ο βασιλευς συστησαμενος παν το συμποσιον εις ευφροσυνην τραπηναι παρεκαλει
37 τον δε {Ερμωνα προσκαλεσαμενος μετα απειλης ειπεν ποσακις δε δει σοι περι τουτων αυτων προσταττειν αθλιωτατε
38 τους ελεφαντας ετι και νυν καθοπλισον εις την αυριον επι τον των Ιουδαιων αφανισμον
39 οι δε συνανακειμενοι συγγενεις την ασταθη διανοιαν αυτου θαυμαζοντες προεφεροντο ταδε
40 βασιλευ μεχρι τινος ως αλογους ημας διαπειραζεις προστασσων ηδη τριτον αυτους αφανισαι και παλιν επι των πραγματων εκ μεταβολης αναλυων τα σοι δεδογμενα
41 ων χαριν η πολις δια την προσδοκιαν οχλει και πληθυουσα συστροφαις ηδη και κινδυνευει πολλακις διαρπασθηναι
42 οθεν ο κατα παντα Φαλαρις βασιλευς εμπληθυνθεις αλογιστιας και τας γινομενας προς επισκοπην των Ιουδαιων εν αυτω μεταβολας της ψυχης παρ ουδεν ηγουμενος ατελεστατον βεβαιως ορκον ορισαμενος τουτους μεν ανυπερθετως πεμψειν εις αδην εν γονασιν και ποσιν θηριων ηκισμενους
43 επιστρατευσαντα δε επι την Ιουδαιαν ισοπεδον πυρι και δορατι θησεσθαι δια ταχους και τον αβατον ημιν αυτων ναον πυρι πρηνεα εν ταχει των συντελουντων εκει θυσιας ερημον εις τον απαντα χρονον καταστησειν
44 τοτε περιχαρεις αναλυσαντες οι φιλοι και συγγενεις μετα πιστεως διετασσον τας δυναμεις επι τους ευκαιροτατους τοπους της πολεως προς την τηρησιν
45 ο δε ελεφανταρχης τα θηρια σχεδον ως ειπειν εις καταστεμα μανιωδες αγειοχως ευωδεστατοις πομασιν οινου λελιβανωμενου φοβερως κεκοσμημενα κατασκευαις
46 περι την εω της πολεως ηδη πληθεσιν αναριθμητοις κατα του ιπποδρομου καταμεμεστωμενης εισελθων εις την αυλην επι το προκειμενον ωτρυνε τον βασιλεα
47 ο δε οργη βαρεια γεμισας δυσσεβη φρενα παντι τω βαρει συν τοις θηριοις εξωρμησε βουλομενος ατρωτω καρδια και κοραις οφθαλμων θεασασθαι την επιπονον και ταλαιπωρον των προσεσημαμμενων καταστροφην
48 ως δε των ελεφαντων εξιοντων περι πυλην και της συνεπομενης ενοπλου δυναμεως της τε του πληθους πορειας κονιορτον ιδοντες και βαρυηχη θορυβον ακουσαντες οι Ιουδαιοι
49 υστατην βιου ροπην αυτοις εκεινην δοξαντες ειναι το τελος της αθλιωτατης προσδοκιας εις οικτον και γοους τραπεντες κατεφιλουν αλληλους περιπλεκομενοι τοις συγγενεσιν επι τους τραχηλους επιπιπτοντες γονεις παισιν και μητερες νεανισιν ετεραι δε νεογνα προς μαστους εχουσαι βρεφη τελευταιον ελκοντα γαλα
50 ου μην δε αλλα και τας εμπροσθεν αυτων γεγενημενας αντιλημψεις εξ ουρανου συνιδοντες πρηνεις ομοθυμαδον ριψαντες εαυτους και τα νηπια χωρισαντες των μαστων
51 ανεβοησαν φωνη μεγαλη σφοδρα τον της απασης δυναμεως δυναστην ικετευοντες οικτιραι μετα επιφανειας αυτους ηδη προς πυλαις αδου καθεστωτας
1 Ελεαζαρος δε τις ανηρ επισημος των απο της χωρας ιερεων εν πρεσβειω την ηλικιαν ηδη λελογχως και παση τη κατα τον βιον αρετη κεκοσμημενος τους περι αυτον καταστειλας πρεσβυτερους επικαλεισθαι τον αγιον θεον προσηυξατο ταδε
2 βασιλευ μεγαλοκρατωρ υψιστε παντοκρατωρ θεε την πασαν διακυβερνων εν οικτιρμοις κτισιν
3 επιδε επι Αβρααμ σπερμα επι ηγιασμενου τεκνα Ιακωβ μεριδος ηγιασμενης σου λαον εν ξενη γη ξενον αδικως απολλυμενον πατερ
4 συ Φαραω πληθυνοντα αρμασιν τον πριν Αιγυπτου ταυτης δυναστην επαρθεντα ανομω θρασει και γλωσση μεγαλορρημονι συν τη υπερηφανω στρατια ποντοβροχους απωλεσας φεγγος επιφανας ελεους Ισραηλ γενει
5 συ τον αναριθμητοις δυναμεσιν γαυρωθεντα Σενναχηριμ βαρυν Ασσυριων βασιλεα δορατι την πασαν υποχειριον ηδη λαβοντα γην και μετεωρισθεντα επι την αγιαν σου πολιν βαρεα λαλουντα κομπω και θρασει συ δεσποτα εθραυσας εκδηλον δεικνυς εθνεσιν πολλοις το σον κρατος
6 συ τους κατα την Βαβυλωνιαν τρεις εταιρους πυρι την ψυχην αυθαιρετως δεδωκοτας εις το μη λατρευσαι τοις κενοις διαπυρον δροσισας καμινον ερρυσω μεχρι τριχος απημαντους φλογα πασιν επιπεμψας τοις υπεναντιοις
7 συ τον διαβολαις φθονου λεουσι κατα γης ριφεντα θηρσιν βοραν Δανιηλ εις φως ανηγαγες ασινη
8 τον τε βυθοτρεφους εν γαστρι κητους Ιωναν τηκομενον αφιδων απημαντον πασιν οικειοις ανεδειξας πατερ
9 και νυν μισυβρι πολυελεε των ολων σκεπαστα το ταχος επιφανηθι τοις απο Ισραηλ γενους υπο εβδελυγμενων ανομων εθνων υβριζομενοις
10 ει δε ασεβειαις κατα την αποικιαν ο βιος ημων ενεσχηται ρυσαμενος ημας απο εχθρων χειρος ω προαιρη δεσποτα απολεσον ημας μορω
11 μη τοις ματαιοις οι ματαιοφρονες ευλογησατωσαν επι τη των ηγαπημενων σου απωλεια λεγοντες ουδε ο θεος αυτων ερρυσατο αυτους
12 συ δε ο πασαν αλκην και δυναστειαν εχων απασαν αιωνιε νυν επιδε ελεησον ημας τους καθ υβριν ανομων αλογιστον εκ του ζην μεθισταμενους εν επιβουλων τροπω
13 πτηξατω δε εθνη σην δυναμιν ανικητον σημερον εντιμε δυναμιν εχων επι σωτηρια Ιακωβ γενους
14 ικετευει σε το παν πληθος των νηπιων και οι τουτων γονεις μετα δακρυων
15 δειχθητω πασιν εθνεσιν οτι μεθ ημων ει κυριε και ουκ απεστρεψας το προσωπον σου αφ ημων αλλα καθως ειπας οτι ουδε εν τη γη των εχθρων αυτων οντων υπερειδον αυτους ουτως επιτελεσον κυριε
16 του δε Ελεαζαρου ληγοντος αρτι της προσευχης ο βασιλευς συν τοις θηριοις και παντι τω της δυναμεως φρυαγματι κατα τον ιπποδρομον παρηγεν
17 και θεωρησαντες οι Ιουδαιοι μεγα εις ουρανον ανεκραξαν ωστε και τους παρακειμενους αυλωνας συνηχησαντας ακατασχετον πτοην ποιησαι παντι τω στρατοπεδω
18 τοτε ο μεγαλοδοξος παντοκρατωρ και αληθινος θεος επιφανας το αγιον αυτου προσωπον ηνεωξεν τας ουρανιους πυλας εξ ων δεδοξασμενοι δυο φοβεροειδεις αγγελοι κατεβησαν φανεροι πασιν πλην τοις Ιουδαιοις
19 και αντεστησαν και την δυναμιν των υπεναντιων επληρωσαν ταραχης και δειλιας και ακινητοις εδησαν πεδαις
20 και υποφρικον και το του βασιλεως σωμα εγενηθη και ληθη το θρασος αυτου το βαρυθυμον ελαβεν
21 και απεστρεψαν τα θηρια επι τας συνεπομενας ενοπλους δυναμεις και κατεπατουν αυτας και ωλεθρευον
22 και μετεστραφη του βασιλεως η οργη εις οικτον και δακρυα υπερ των εμπροσθεν αυτω μεμηχανευμενων
23 ακουσας γαρ της κραυγης και συνιδων πρηνεις απαντας εις την απωλειαν δακρυσας μετ οργης τοις φιλοις διηπειλειτο λεγων
24 παραβασιλευετε και τυραννους υπερβεβηκατε ωμοτητι και εμε αυτον τον υμων ευεργετην επιχειρειτε της αρχης ηδη και του πνευματος μεθισταν λαθρα μηχανωμενοι τα μη συμφεροντα τη βασιλεια
25 τις τους κρατησαντας ημων εν πιστει τα της χωρας οχυρωματα της οικιας αποστησας εκαστον αλογως ηθροισεν ενθαδε
26 τις τους εξ αρχης ευνοια προς ημας κατα παντα διαφεροντας παντων εθνων και τους χειριστους πλεονακις ανθρωπων επιδεδεγμενους κινδυνους ουτως αθεσμως περιεβαλεν αικιαις
27 λυσατε εκλυσατε αδικα δεσμα εις τα ιδια μετ ειρηνης εξαποστειλατε τα προπεπραγμενα παραιτησαμενοι
28 απολυσατε τους υιους του παντοκρατορος επουρανιου θεου ζωντος ος αφ ημετερων μεχρι του νυν προγονων απαραποδιστον μετα δοξης ευσταθειαν παρεχει τοις ημετεροις πραγμασιν
29 ο μεν ουν ταυτα ελεξεν οι δε εν αμερει χρονω λυθεντες τον αγιον σωτηρα θεον αυτων ευλογουν αρτι τον θανατον εκπεφευγοτες
30 ειτα ο βασιλευς εις την πολιν απαλλαγεις τον επι των προσοδων προσκαλεσαμενος εκελευσεν οινους τε και τα λοιπα προς ευωχιαν επιτηδεια τοις Ιουδαιοις χορηγειν επι ημερας επτα κρινας αυτους εν ω τοπω εδοξαν τον ολεθρον αναλαμβανειν εν τουτω εν ευφροσυνη παση σωτηρια αγαγειν
31 τοτε οι το πριν επονειδιστοι και πλησιον του αδου μαλλον δε επ αυτω βεβηκοτες αντι πικρου και δυσαιακτου μορου κωθωνα σωτηριον συστησαμενοι τον εις πτωσιν αυτοις και ταφον ητοιμασμενον τοπον κλισιαις κατεμερισαντο πληρεις χαρμονης
32 καταληξαντες δε θρηνων πανοδυρτον μελος ανελαβον ωδην πατριον τον σωτηρα και τερατοποιον αινουντες θεον οιμωγην τε πασαν και κωκυτον απωσαμενοι χορους συνισταντο ευφροσυνης ειρηνικης σημειον
33 ωσαυτως δε και ο βασιλευς περι τουτων συμποσιον βαρυ συναγαγων αδιαλειπτως εις ουρανον ανθωμολογειτο μεγαλομερως επι τη παραδοξω γενηθειση αυτω σωτηρια
34 οι τε πριν εις ολεθρον και οιωνοβρωτους αυτους εσεσθαι τιθεμενοι και μετα χαρας απογραψαμενοι κατεστεναξαν αισχυνην εφ εαυτοις περιβαλομενοι και την πυροπνουν τολμαν ακλεως εσβεσμενοι
35 οι τε Ιουδαιοι καθως προειρηκαμεν συστησαμενοι τον προειρημενον χορον μετ ευωχιας εν εξομολογησεσιν ιλαραις και ψαλμοις διηγον
36 και κοινον ορισαμενοι περι τουτων θεσμον επι πασαν την παροικιαν αυτων εις γενεας τας προειρημενας ημερας αγειν εστησαν ευφροσυνους ου ποτου χαριν και λιχνειας σωτηριας δε της δια θεον γενομενης αυτοις
37 ενετυχον δε τω βασιλει την απολυσιν αυτων εις τα ιδια αιτουμενοι
38 απογραφονται δε αυτους απο πεμπτης και εικαδος του Παχων εως της τεταρτης του Επιφι επι ημερας τεσσαρακοντα συνιστανται δε αυτων την απωλειαν απο πεμπτης του Επιφι εως εβδομης ημεραις τρισιν
39 εν αις και μεγαλοδοξως επιφανας το ελεος αυτου ο των παντων δυναστης απταιστους αυτους ερρυσατο ομοθυμαδον
40 ευωχουντο δε πανθ υπο του βασιλεως χορηγουμενοι μεχρι της τεσσαρεσκαιδεκατης εν η και την εντυχιαν εποιησαντο περι της απολυσεως αυτων
41 συναινεσας δε αυτοις ο βασιλευς εγραψεν αυτοις την υπογεγραμμενην επιστολην προς τους κατα πολιν στρατηγους μεγαλοψυχως την εκτενιαν εχουσαν
1 βασιλευς Πτολεμαιος Φιλοπατωρ τοις κατ Αιγυπτον στρατηγοις και πασιν τοις τεταγμενοις επι πραγματων χαιρειν και ερρωσθαι
2 ερρωμεθα δε και αυτοι και τα τεκνα ημων κατευθυναντος ημιν του μεγαλου θεου τα πραγματα καθως προαιρουμεθα
3 των φιλων τινες κατα κακοηθειαν πυκνοτερον ημιν παρακειμενοι συνεπεισαν ημας εις το τους υπο την βασιλειαν Ιουδαιους συναθροισαντας συστημα κολασασθαι ξενιζουσαις αποστατων τιμωριαις
4 προφερομενοι μηδεποτε ευσταθησειν τα πραγματα ημων δι ην εχουσιν ουτοι προς παντα τα εθνη δυσμενειαν μεχρι αν συντελεσθη τουτο
5 οι και δεσμιους καταγαγοντες αυτους μετα σκυλμων ως ανδραποδα μαλλον δε ως επιβουλους ανευ πασης ανακρισεως και εξετασεως επεχειρησαν ανελειν νομου Σκυθων αγριωτεραν εμπεπορπημενοι ωμοτητα
6 ημεις δε επι τουτοις σκληροτερον διαπειλησαμενοι καθ ην εχομεν προς απαντας ανθρωπους επιεικειαν μογις το ζην αυτοις χαρισαμενοι και τον επουρανιον θεον εγνωκοτες ασφαλως υπερησπικοτα των Ιουδαιων ως πατερα υπερ υιων δια παντος συμμαχουντα
7 την τε του φιλου ην εχουσιν βεβαιαν προς ημας και τους προγονους ημων ευνοιαν αναλογισαμενοι δικαιως απολελυκαμεν πασης καθ οντινουν αιτιας τροπον
8 και προστεταχαμεν εκαστω παντας εις τα ιδια επιστρεφειν εν παντι τοπω μηθενος αυτους το συνολον καταβλαπτοντος μητε ονειδιζειν περι των γεγενημενων παρα λογον
9 γινωσκετε γαρ οτι κατα τουτων εαν τι κακοτεχνησωμεν πονηρον η επιλυπησωμεν αυτους το συνολον ουκ ανθρωπον αλλα τον πασης δεσποζοντα δυναμεως θεον υψιστον αντικειμενον ημιν επ εκδικησει των πραγματων κατα παν αφευκτως δια παντος εξομεν ερρωσθε
10 λαβοντες δε την επιστολην ταυτην ουκ εσπουδασαν ευθεως γενεσθαι περι την αφοδον αλλα τον βασιλεα προσηξιωσαν τους εκ του γενους των Ιουδαιων τον αγιον θεον αυθαιρετως παραβεβηκοτας και του θεου τον νομον τυχειν δι αυτων της οφειλομενης κολασεως
11 προφερομενοι τους γαστρος ενεκεν τα θεια παραβεβηκοτας προσταγματα μηδεποτε ευνοησειν μηδε τοις του βασιλεως πραγμασιν
12 ο δε ταληθες αυτους λεγειν παραδεξαμενος και παραινεσας εδωκεν αυτοις αδειαν παντων οπως τους παραβεβηκοτας του θεου τον νομον εξολεθρευσωσιν κατα παντα τον υπο την βασιλειαν αυτου τοπον μετα παρρησιας ανευ πασης βασιλικης εξουσιας και επισκεψεως
13 τοτε κατευφημησαντες αυτον ως πρεπον ην οι τουτων ιερεις και παν το πληθος επιφωνησαντες το αλληλουια μετα χαρας ανελυσαν
14 ουτως τε τον εμπεσοντα των μεμιαμμενων ομοεθνη κατα την οδον εκολαζοντο και μετα παραδειγματισμων ανηρουν
15 εκεινη δε τη ημερα ανειλον υπερ τους τριακοσιους ανδρας ην και ηγαγον ευφροσυνην μετα χαρας βεβηλους χειρωσαμενοι
16 αυτοι δε οι μεχρι θανατου τον θεον εσχηκοτες παντελη σωτηριας απολαυσιν ειληφοτες ανεζευξαν εκ της πολεως παντοιοις ευωδεστατοις ανθεσιν κατεστεμμενοι μετ ευφροσυνης και βοης εν αινοις και παμμελεσιν υμνοις ευχαριστουντες τω θεω των πατερων αυτων αιωνιω σωτηρι του Ισραηλ
17 παραγενηθεντες δε εις Πτολεμαιδα την ονομαζομενην δια την του τοπου ιδιοτητα ροδοφορον εν η προσεμεινεν αυτους ο στολος κατα κοινην αυτων βουλην ημερας επτα
18 εκει εποιησαν ποτον σωτηριον του βασιλεως χορηγησαντος αυτοις ευψυχως τα προς την αφιξιν παντα εκαστω εως εις την ιδιαν οικιαν
19 καταχθεντες δε μετ ειρηνης εν ταις πρεπουσαις εξομολογησεσιν ωσαυτως κακει εστησαν και ταυτας αγειν τας ημερας επι τον της παροικιας αυτων χρονον ευφροσυνους
20 ας και ανιερωσαντες εν στηλη κατα τον της συμποσιας τοπον προσευχης καθιδρυσαντες ανελυσαν ασινεις ελευθεροι υπερχαρεις δια τε γης και θαλασσης και ποταμου ανασωζομενοι τη του βασιλεως επιταγη εκαστος εις την ιδιαν
21 και πλειστην η εμπροσθεν εν τοις εχθροις εξουσιαν εσχηκοτες μετα δοξης και φοβου το συνολον υπο μηδενος διασεισθεντες των υπαρχοντων
22 και παντα τα εαυτων παντες εκομισαντο εξ απογραφης ωστε τους εχοντας τι μετα φοβου μεγιστου αποδουναι αυτοις τα μεγαλεια του μεγιστου θεου ποιησαντος τελειως επι σωτηρια αυτων
23 ευλογητος ο ρυστης Ισραηλ εις τους αει χρονους αμην